Momentalisht, ekipi i IKS-it është duke punuar në projektin e financuar nga Komisioni Evropian, nën grantin e Instrumentit për Demokraci dhe të Drejta të Njeriut (IDDNJ), të titulluar “Ekonomia politike e Mitrovicës dhe Gjakovës: Ndikimi në stabilitetin social dhe politik.”
Një dekadë pas luftës, qytetarët e Kosovës ende duhet t’i kthehen jetës “normale.” Afërsisht 2,000 njerëz mbesin të zhdukur, papunësia shënon rreth 44 përqind, më së shumti tek gratë dhe tek një pjesë e madhe e rinisë së Kosovës. Mundësitë e pakta të punësimit po kontribuojnë në emigrim, sidomos në ekonomitë rurale të goditura rëndë, ku ndërmarrjet e mëdha shoqërore ende nuk janë funksionalizuar.

       Ndër më të prekurat nga papunësia dhe emigrimi është komuna e Gjakovës, e cila dikur mburrej me numrin më të madh të punësuarve në të gjithë ish-Jugosllavinë – 27,500 të punësuar në industri dhe shërbime deri në fund të vitit 1988. Momentalisht, gratë kryefamiljare luftojnë që të ushqejnë familjet e tyre dhe disa prej tyre kanë siguruar të drejta pronësore. Afërsisht, 65 kilometra në veriperëndim, ura mbi lumin Ibër ndan shumicën shqiptare në jug nga shumica serbe në veri të komunës së Mitrovicës. Ky qytet është bërë simboli ndërkombëtar i ndarjeve etnike që bezdisin Kosovën. Deklarata e Pavarësisë së Kosovës mbetet e panjohur në veri, e cila ende funksionon nën drejtimin politik të Beogradit dhe ku përdoret dinari serb si monedhë e tyre. Se cili legjislacion është në fuqi dhe cilat autoritete janë përgjegjëse për Veri, nuk është vendosur deri më sot. Betejat për pronësi mbesin të pazgjidhura. 
  
       Projekti synon të sigurojë pjesëmarrjen e akterëve të shoqërisë civile në zhvillimin shoqëror, ekonomik dhe politik të Kosovës drejt një të ardhme evropiane. Për me shumë, objektivat e projektit përfshijnë: 1) Përfshirjen e shoqërisë civile në mbikëqyrjen e fuqizimit të proceseve politiko-ekonomike në Kosovë drejt integrimit në BE, 2) Politikat drejt zhvillimit politik, ekonomik dhe shoqëror të fuqizuara sipas standardeve evropiane; dhe 3) Konsensuset e vazhdueshme politike, shoqërore dhe ekonomike rreth komunitetit të ndarë të Mitrovicës.